فن وإعلام

وْلَادْ بَابْ الله (زجل)

نَجْمَعْ الشّوكْ حَفْيَانْ
رِيحْ لَهْبَالْ خْدَانِي
جِسْمِي مَذْبَالْ
فَعْطِيّا رَبَّانِيَا
لَعْقَلْ سَتْرَةْ لَبْدَانْ
وَلّي طْفَلُو
فَ الدَّنْيَا سَرْحَانْ
*****

فِكْرِي مْهَلْوَسْ تِيهَانْ
  حْمَقْ يَتْقَالْ فَ حْسَانِي
  دَرْبَالَةْ نَتْسَالْ
وَالسْمَا حَرْفِيَّا
لْبَرْدْ شَقَّقْ لَبْدَانْ
رَاسِي فَهْوَالُو
شَعْكَاكَةْ كَيْبَانْ
*****

مَا نَطْلَبْ احْسَانْ
  رْجَالْ الله تَكْرَمْنِي
  مَا نَعْرَفْ نَحْتَالْ
صُبْحِي كِ لَعْشِيّا
نْمَهْمَهْ مْسَطِّي عَرْيَانْ
عَقْلِي فَاحْوَالُو
مَضْطَرَبْ عَيَّانْ
*****

كْسَاتْ لَحْمِي لَدْرَانْ
سَاكَنْ جَوّالْ فَقْدَامِي
  نَفْلِي لَقْمَالْ
قَصْتِي مَرْثِيا
تْزَدْتْ كِيفْ الصَّبْيَانْ
زِينْفَكْمَالُو
نَرْوَى بَحْنَانْ
*****

كْبَرْتْ بَخُّوتْ فَرْحَانْ
لِيعْتْ لَفْرَاقْ غْصَبْنِي
  دَارُو لَحْوَالْ
أُسْرَةْ مَرْمِيّا
سَارْ بَقْضَاهْ الرَحْمَانْ
صْبِي فَهْبَالُو
كْبَرْتْ هَيْمَانْ
*****

نْخَالْ النّاسْ عَدْيَانْ
  تَاكُلْ لَحْمْ بْدَانِي
تْبِيعْنِي بَالْمَالْ
شُوكَتْهُمْ قْوِيّا
نَهْرَبْ خَايَفْ شَجْعَانْ
نَاسْ حْتَالُو
فْرَزْقِي بَالْبُهْتَانْ
*****

مَلْكُوا الرّهُوطْ لَوْطَانْ
وَانَا السُّوسْ كْلَانِي
مَهْمُولْ الْحَالْ
مَجْهُولْ لَكْنِيّا
نْهَارْ زَارْ السُّلْطَانْ
جِيتْ نَتْلَقّالُو
جْمَعْنِي سَجَّانْ
*****

مْكَتَّفْ بَحْبَلْ عَرْيَانْ
هَايَجْ بَجْنُونْ كْوَانِي
طْبِيبْ مَخْتَالْ
خَدَّرْنِي بْأَدْوِيَّا
نْعَسْتْ بَاقِ هَذْيَانْ
فَمِّي فَدْفَالُو
تَحْتِي فَزْكَانْ
*****

نَحْلَمْ لْوَرْدْ نَعْسَانْ
  حُبْ النَّاسْ رْوَانِي
تْحِيطْنِي بَوْصَالْ
رْعَايَةْ إِنْسِيّا
هَذِي مْرَمَّةْ حَمَّانْ
الْعَلَمِي فَنْظَامُو
يَرْجَا الْمَنَّانْ

عبد الجبار المنوني