الرئيسية
نهار السوق
كان كلشي يتمناه
حنا
وميرنا وكلابنا
وجدة
لبابها قدام بابنا
كانت تحلم
بالسوق وتتسناه
وحنا بلا تشامير
فرحبت لحمير
اول فيلم جنسي شفناه
كنت نحلم بذيك الرغة
نحسب سالفتها زغبة زغبة
وكان قلبي يشعل يشعل
ويرجع ثاني يهبا
وبكل حنان ورهبة
نشوف حمارنا لكحل
جايب حمارة شهبة
وهاذ لحمار
عارفني كنعاني
ضحك وشاف فيا بلعاني
كان كل سوق فاقصني
قول كان عارفني
وعارف اش ناقصني
وكان السور حجر
واقف بلا سواري
وحمارنا لاح البردعة
وطيح فالطريق الشواري
ويجري على بحر الخبب
قول
يحنقز بميزان هواري
كنا نتستفو فوق السور
الوجوه ضاحكة
والقلب مكسور
تقول فالرحبة جيفة
وحنا فوقها نسور
وذاك لفقيه
لجانا مدرج
وقال تفو
على جيل مبرج
جرى علينا
ووقف هو يتفرج
نسى صلاتو وصيامو
تنهد، وتفكر ايامو
تفكر الجري
فزنايگ النوار
تفكر لمحاضرية
وشارفات الدوار
وقلنا
محلاها عيشت لحمير
شي تابع شي
وشي من شي طاج
ما كاينش حمار مرسم
ولا حمار متعاقد فالسطاج
وحمار طالق اللحية
وحمار محسن الموسطاج
ولا حمار
محمل حمارة
ولا حمارة
حاكموها ع الكورطاج
