رأي

رجاء بومهدي: مشكلتي مع السياسة ما هي لا مادية ولا معنوية... مشكلتي أنه خاصني نولي نقول للكلب سيدي

كل ما قربات الإنتخابات كتبدا تتكالب عليا بعض العناصر في الدوار، ومع انني كل مرة كنقول انه ما عنديش نية الترشح، ولكن صعيب يتيقو انه شي واحد يقدر يدير الخير لوجه الله ماشي لوجه الإنتخابات.

هو نقدر نفهم شحال صعيبة عليكم 52 دوار يولي يهتف باسم رجاء، وصعيب عليكم تشوفو الفئة الناخبة الفتية لي غادي تبدا تصوت من هنا لعامين ولا تلت سنين تجي كتجري ملي كتبان ليها الطوموبيل دخلات لشي دوار غير لإلقاء السلام، وصعيب عليكم تتقبلو بزاف دلحوايج لي طراو في هاد خمس سنين.

مشكلتي مع السياسة ماشي هوما "غرارين عايشة"، أرجاء غير ترشحي والله حتا نصوتو عليك وهوما بركاكة ديال الأعضاء.

ماشي مولات الفيرما والحانوت لي تتقوليهم انني كنتصور باش نربح لفلوس، راه ميدي1 وقناة الدوتشيه والله مكيعطيو لفلوس اختي...صافي ما بغيتش نعطيك قفة حيت ميسورة، قلبي الصفحة. الحاصول، ايلا كان القلب جيعان آش بغا يدير ليك الجيب ايلا كان عامر.

وماشي حتا مع البرلماني لي متيق انه خدا المقعد بدراعو، وهو ماعمرو ما حط يدو في السياسة من قبل، لولا الأباطرة ديال الأصالة عمرك كنتي تحلم بيه. هاداك لي ملي كتكلس معاه كيكوليكم حضيو من رجاء، ولا كيقبط التلفون في يدو وكيقوليكم يالاه عيط ليا المعلم لكبير (بغينا نعرفو اينا معلم فيهم، واش سعد لمجرد؟).

ماشي حتا مع هاداك العضو لي تلقا لسيارة الإسعاف في الطريق الوطنية وكان غادي يقتل الناس، وبلاصتو بدل انها تكون في الحبس، هي دابا في حزب باغي يتو(ر)أس الحكومة.

وزيد وزيد...

مشكلتي ما هي لا مادية ولا معنوية، مشكلتي مع السياسة، هي أنه الكلب خاصني نولي نقوليه سيدي.