بعد استراحة كانت ضرورية وواجبة ….كنرجع اليوم نتقاسم معاكم ثلاث صور قاحلة في الممارسة السياسية، صور كتخلينا نطرحو أسئلة مؤلمة على معنى التربية المواطَنية داخل الأحزاب السياسية….

لأنه، بكل بساطة، ماشي كل من جمع الناس في “شابطو”…  او جمع ناس فشي مناظرة معندوم علاقة بها، ولا عارفين موضوعها،،، أو ادعي  أنه كيمارس السياسة،  راه فعلا كيمارسها….

ما يمكنش تقول على راسك سياسي… وانت كتعتبر بعض التصرفات “تافهة” أو “ما تستاهلش”…. فاش الواقع كيبين أنها تصرفات كتخرب ما تبقى من ثقة المواطنين فالحقل السياسي…..

واش فعلا غادي نعتبرو قاعة نشاط سياسي موسخة بالأزبال من الداخل والخارج أمر عادي؟

واش هذا هو النموذج لي بغيتو توصلوه للمواطن … لا تنظيم لا احترام.. لا تقدير للوقت  ولا للإنسان .. 

الناس بقات تتجمع من الصباح الباكر ..  في ظروف صعبة .. الصهد. او بزاف بزاف ديال الانتظار ….. وهوما مكدسين كيساينو القيادة الحزبية تجي ملي يرشق ليها….

السياسة قيم وسلوك قبل ما تكون شعارات ولا منصات ولا ألوان ….  وحتى محاولة اقتباس دور السياسي / ة الخطيب /ة بكثير من التصنع.. ولى مفروش عند المواطنين….

وما خفي أعظم… اللي شاف  لقاء اليوم ديال حزب رئيس الحكومة فأكادير… غادي  يظهر له بزاف بزاف بزاف  ديال سيارات الدولة متجمعة قدام مكان النشاط… تابعة الجماعات .. مؤسسات عمومية.. الجمعيات … وحتى سيارات نقل مدرسي ممولة من مال دافعي الضرائب.. ومخصصة لتلاميذ الدواوير اللي كتقطع كيلومترات للوصول لمدارسهم…. 

والمصيبة،…  أن هاد الشي ماشي مخبي .. بالعكس الرسالة واضحة …

إحنا فوق القانون، وإحنا عندنا حماية، وإحنا نقدروا نديرو اللي بغينا… 

وإلا فكيفاش نفسر أن هاد السيارات توضع قدام القاعة بكل قلة الحيا …

إما هاد الناس…  ما كيهمهم لا الرأي العام.. لا القوانين… لا إعلام … وواثقين أنهم غادي يرجعو يتحكمو فالجماعات والجهات والعباد بلا ما يرف لهم جفن….. 

أو ببساطة …. باغيين يوصلو لينا رسالة أن الدولة ما تقدرش عليهم…. وأن - انعدام الشفافية-  عندهم ماشي مشكل… بل وسيلة للهيمنة… 

وفي جميع الحالات… إحنا أمام استغلال فاضح للنفوذ… وهدر ممنهج للمال العام.. وفساد انتخابي صريح…. 

والصمت على هاد الخروقات كيعني حاجة وحدة…  إما عجز.،..، أو تواطؤ….

ولهذا… خاصنا  نرجعو نسولو راسنا:

 شكون كيأطر.، شنو نوع التربية اللي كتنعطى داخل هاد النوع  من الأحزاب.. شكون كيدفع الفاتورة ديال هاد العبث … او خاصنا  نقولوها بكل وضوح….  السكوت على هاد الصور القاحلة هو مشاركة غير مباشرة فيها….

واللي باغي يمارس السياسة بحق… خاصو يبدأ بتقويم ذاتو… ويآمن أن   احترام المواطنين ماشي فضل بل واجب …