واحد النقاش غريب وليت كنشوفو مؤخراً عند بعض الناس . كاين اللي كيشوف الاستعمال ديال الذكاء الاصطناعي (IA) في الحياة اليومية – سواء فالقراية، فالخدمة، ولا فالتسيير ديال الإدارة – بحال إلا هو دليل على الضعف ولا نقص فالكفاءة. كتسمع شي هضرة بحال: "إيلا كنتي كتستعن بالـ IA، راه حيت ما قادش دير الشغل بوحدك"، وتلقاهم كيتغمزو ويضحكو بسخرية.

صراحة، هادي عقلية غريبة ومحدودة بزاف!

هاد الشي كيفكرني بذاك الوقت فاش دزنا من الماكينة د لكتيبة (الـ Dactilo) للكومبيوتر و لبرامج بحال Word و Excel. فديك الوقيتة، الساخرين كانوا كيعيبو على الناس اللي شادين الحاسوب وكيقولوا عليهم "معكازين". واليوم؟ فين هما هاد الساخرين؟ ببساطة، التاريخ تجاوزهم وخرجوا من اللعبة.

العالم اليوم مابقاش كيتساءل واش نخدمو بالذكاء الاصطناعي ولا لا، بل السؤال هو كيفاش نسرعوا الاستغلال ديالو:

فالشينوا مثلاً: كيبداو يلقنوا أساسيات الـ IA للأطفال ملي كيكونوا عاد فالمدرسة الابتدائية باش يوجدوهم للمستقبل.

فالدول المتقدمة: الـ IA ولى جزء لا يتجزأ من الحياة اليومية؛ هو اللي كيحمي الأنظمة المعلوماتية، وهو اللي كيسرع التشخيص الطبي، وحتى فالمراسلات المهنية اليومية ولى مدمج بشكل تلقائي.

الذكاء الاصطناعي ماشي وسيلة للاتكال أو العجز، بل هو مضاعف للقدرات ديال العقل البشري. هو كيهنيك من المهام الروتينية اللي كتضيع الوقت، باش يخليك تركز على الصح: على التفكير النقدي، الإبداع، الرؤية الاستراتيجية، واتخاذ القرار.

اللي كيختار يضحك اليوم على طالب ولا مهني كيتعاون مع الـ IA، راه فالحقيقة كيحكم على راسو يبقى حاصل فواحد العالم قديم ومات. قطار التنمية م كيتسناش الناس اللي كتحن للور.

المغرب ديالنا خدا مسار استراتيجي وشجاع فالتحديث، والرقمنة، والانفتاح على التكنولوجيات الحديثة. هاد الاختيار هو اللي غايضمن الرفاهية ديال المواطنين ديالنا والمكانة ديال بلادنا وسط الأمم اللي كتقدم.

ماتخافوش من المستقبل. نتقبلوا الحداثة، نكونوا شبابنا، ونطوروا إداراتنا... ونخليو أصحاب الأفكار القديمة فبلاصتهم. المستقبل كيتصاوب مع الناس اللي كتعرف تستعمل الأدوات ديال وقتها.

ديما لقدام!